Magaalada Dhuusamareeb oo si weyn ugu diyaar garoobeysa doorashada madaxweynaha Galmudug.
Magaalada Dhuusamareeb ee Xarunta Gobolka Galgaduud ayaa ku jirta marxalad mashquul ah, taasoo ka dhalatay dhismaha maamulka cusub ee Galmudug.
Toddobaadyadii la soo dhaafay ayaa waxaa Magaalada Dhuusamareeb gaaray Wasiiro, Xildhibaano, Siyaasiyiin, Saraakiil ciidan, ganacsato, odayaal, waxgarad iyo qurbajoog.
Ujeedka dadkani ay magaaladaasi u taggeen ayaaa lagu sheegay arrimo la xiriira marxaladda habraaca kala guurka iyo geedi-socodka dhismaha maamulka galmudug.
Magaalada ayaa waxaa xilligan ka soconaya kulamo loogu ololeynayo Doorashada Madaxweynaha Galmudug iyo Madaxweyne Kuxigeenka.
Inkastoo aan weli la shaacin goorta la qabanayo Doorashada Madaxtooyada Galmudug ayaa waxaa hadana lagu hawlan yahay soo saarista jadwalka, ay tahay in loo raaco doorasahadaasi.
Dhanka kale waxaa aad loo adkeeyay amniga Magaalada Dhuusamareeb, iyadoo ciidamadu ay kordhiyeen hawlgalada ay ku xaqiijnayan amniga magaaladaasi. Ciidamada ayaana si joogto ah roondo uga sameeyo wadooyinka magaalada.
Dadka reer Dhuusamareeb iyo martida la joogta ayaa rajeynaya in inta ka harsan dhismaha maamulka, ay si nabdoon ugu soo idlaato.
