Dowlada Sucuudi Carabiya iyo Qadar oo heshiis gaaray, islamrkana soo jeediyey in la isku furo xuduudaha iyo hawada

Dowladaha Sacuudiga iyo Qatar ayaa xalay gaaray heshiis ah in ay dib isugu furaan xuduudaha Hawada, Cirka iyo dhulka kadib xiisadii khaliijka ka taagneed muddo saddex sano ku dhow.

Dalalka xulufada la ah Sacuudiga sida Masar Imaaraadka iyo Baxreyn ayaa sidoo kale xayiraadda ka qaadi doono Qatar.

Soomaaliya ayaa horey dhex dhexaad uga noqotay xurgufta siyaasadeed ee ka dhex taagneed dalalka Carbeed.

Soomaaliya aad ayaa loogu amaanay doorkii dhexdhexaadnimada ee ay ka qaadatay khilaafka siyaasadeed ee u dhexeeyay Qatar iyo dalalka khaliijka kuwaas oo gabi ahaanba jaray xiriirkii ay la lahaayeen Qatar.

Wasiirka Arrmaha dibadda Kuwait ayaa sheegay in lagu heshiiyay in Qatar iyo Saudi Arabia ay furaan xudduudohooda Dhulka, Cirka iyo Badda, tallaabo bilow u ah soo celinta xiriirkii labada dal oo muddo go’naa.

Maanta waxaa Sacuudiga ka dhici doona shir madaxeedka dalalka Golaha Iskaashiga Khaliijka.

Dhaxal sugaha Sacuudiga Maxamed Bin Salmaan ayaa sheegay in shir-madaxeedka maanta uu noqon doono mid midnimo iyo isku duubni, si loo wajaho caqabadaha haysta dalalka gobolka.

Tan iyo markii uu soo baxay khilaafka siyaasadeed ee dalalka khaliijka ka dhexeeya,labada dhinac ayaa dowladda faderaalka soomaaliya ka codsanayay in ay ku taageerto mowqifkooda balse dowladda uu hoggaamiyo madaxweyne farmaajo ayaa qaadatay kaalintii ku habooneyd taas oo aheyd in dhexdhexaad ay ka noqotay danaha gaarka ah ee ka dhexeeya dalalka khaliijka.

Siyaasiyiin badan oo saaxiibo la ah dalalka is hayay ayaa dowladda ku eedeeyay go’aanka ay qaadatay waxaana ay sheegeen in dowladdu ku qaldaneyd go’aankaas balse waxaa si cad ay warbaahinadda caalamka u ammaaneen doorkaas ay soomaaliya qaadatay kaas oo ay ku tilmaameen mid muhiim u ah saaxiibtinimada soomaaliya ee dalalka khaliijka kuwaas oo bartamihii 2017 isku hayay danahooda gaarka ah